اصلي پاڼه | دری | English |
عمومی معلوماتExpand عمومی معلومات
د مشرانو جرګې جوړښتExpand د مشرانو جرګې جوړښت
خبرونه او رپوټونهExpand خبرونه او رپوټونه
کورني اسنادExpand کورني اسناد
خپرنیزېExpand خپرنیزې
مونږسره اړيكه
چهارشنبه ٬د سلواغې ۸ مه٬ ۱۳۹۹ ل

د مشرانو جرګې مطبوعاتي دفتر

د ۱۳۹۹ کال د مرغومي ۱۴ مه

د مشرانوجرګې د رئيس فضل هادي مسلم یار په مشرۍ د دې جرګې د یکشنبې ورځې ناسته کې دخبریالانو اومدني فعالانو د امنیت د ټینګښت په اړه د اعلامیې د صادرولو سربېره د حکومت د تشکیلاتو اړوندو مسئولانو یوشمېر دولتي ادارو کې د وروستیو تنقیصاتو په اړه څرګندونې وکړې.

14-Jadi99-JAL1.JPG

 غونډه کې د تقنیني، عدلي او قضایی چارو دکمېسیون رئيس مولوی غلام محی الدین منصف او نورو سناتورانو دحکومتي بېلابېلو ادارو کارکوونکو د کتلوي تنقیص، د تنقیص شویو د برخلیک، د ملکي خدمتونو کارکوونکو د ټولیز تشکیل، تیرکال سره د ۱۴۰۰ مالي کال تشکیلاتي توپیر، د هېواد د ولسوالیو کره شمېر، د آزموینې پرته د ولایتونو د مرستیالانو په توګه د یوشمېر میرمنو استخدام، د لیرې شویو ولسوالانو د بی برخلیکۍ ،  دنویوولسوالانو او مرستیالانو داستخدام څرنګوالی چې د ملکي خدمتونو قانون سره مطابقت نه لري او ځینو نورو مواردو اړوند پوښتنې یې د اداري صلاحاتو او ملکي خدمتونو د خپلواک کمېسیون سرپرست او د سیمه اییزو ارګانونو د خپلواکې ادارې مرستیال څخه وپوښتلې.

ورپسې د اداري اصلاحاتو اوملکي خدمتونود خپلواک کمېسیون سرپرست سیدحشمت الله هاشمي خپلوخبرو کې وویل چې دملکي خدمتونو دکارکوونکو ټول تشکیل ۴۳۰ زرو تنو ته رسیږي او سږکال د حکومت تشکیلاتي سقف کې زیات بدلون نه دی راغلی او دعادي بودجې کمښت، وظیفوي تداخل او د ښوونکو د نویو بستونو رامنځته کولو موارد یې ځینو اداروکې د تشکیلاتي تنقیص دلایل وګڼل او زیاته یې کړه چې د کانونو او پترولیم وزارت شاوخوا ۱۲۰۰ تنه کارمندان د یاد وزارت د څېړنو او وړاندیز او د جمهوري ریاست د حکم له مخې ترسره شوي چې دې کمېسیون سره مشوره نده شوې اوڅرګنده هم نده چې دا شمیر کارکوونکي به کومو ادارو ته انتقال شي په داسې حال کې چې د ملکي خدمتونو قانون ادارې مکلفې کړي چې تنقیص شوي کارکوونکې باید ورته بستونو کې په نورو ځایونو کې مقرر شي.

نوموړي زیاته کړه پوهنې وزارت کې تنقیص د ښوونکو د بستونو د زیاتوالي له امله ترسره شوی او د فاریاب ولایت پرته د دیارلسو ولایتونو د ښوونکو د ټولیزو بستونو د آزموینې پایلې اعلان شوی چې د یاد ولایت آزموینه تراوسه نه ده اخیستل شوې. همداراز یې وویل د ولسوالانو د استخدام په کړنلاره کار روان دی خو دم ګړۍ ځینو ولسوالیو کې د امنیتي او ټولنیزو ملحوظاتو له مخې د جمهور رئيس د حکم له مخې ځینې ولسوالان ګمارل کیږي.

14-Jadi99-JAL3.JPG

 ورپسې د سیمه اییزو ارګانونو د خپلواکې ادارې معین روح الله نیازي وویل: دهېواد د رسمي ولسوالیو شمیر ۳۶۴ او د موقتو شمیر یې۲۸ ده چې اجراایه بستونه د ولسوالیو د مرستیالانو بستونو د رامنځته کیدو له پاره تنقیص شوي ترڅو ولسوال وکولای شي د ولسونو مسایلو ته رسیدګي وکړي او مرستیالان یې اجرایوي موارد پرمخ یوسي چې تراوسه د تنقیص شویو له منځه سلوتنو یې ارتقا کړې او د ولسوالیو د مرستیالانو په توګه ګمارل شوي چې د پاتې برخې د ټاکلو له پاره هم کار روان دی.

هغه زیاته کړه چې د ولایتونو د ټولنیزو چارو د مرستیالانو د استخدام کړنلاره نهایي شوې ترڅو د آزادې سیالۍ له لارې وګمارل شي خوسملاسي ځینو ولایتونو له پاره د جمهور رئيس د حکم له مخې مرستیالانې ټاکل شوي دي.

دهغوی دڅرګندونو د اورېدو وروسته دمشرانوجرګې رئيس فضل هادي مسلم یار وویل چې د هېواد د حساسو شرایطو له مخې دولتی ادارې باید د تنقیصاتو په اړه د لازم احتیاط څخه کار و اخلي ترڅو ټولنیزی ستونزې پراخې او دبیکارۍ کچه لوړه نه شي له بلې خوا اجازه دی ورکړل شي چې د ولایتونو د بشري سرچینو ریاستونه د پخوا په شان خپلې دندې پرمخ یوسي چې د مسئولانو له خوا په دی تړاو د پاملرنې ژمنه ورکړل شوه.

د یادولو ده چې نننۍ ناسته کې د جمهوري ریاست د چارو ادارې د مسئولانو نه حضور د قانون خلاف عمل وګڼل شو او ټینګار وشو چې قانون ته درناوی د ټولو ګډ کار دی اوباید مسئولان د دې مجلس غونډو کې ګډون وکړي.

همدارنګه ناسته کې د طبي تخصصي- علمي کادر قانون اړوند د جمهور رئيس ۴۷مه ګڼه تقنیني فرمان چې د جرګې کمېسیونونو کې پرې بحثونه شوي ود عامه هوساینې او چاپيریال ساتنې کمېسیون د رئيس او غړو له خوا وړاندې او د رایو په اکثریت تصویب شو.

 خو د غونډې آزادو بحثونو کې د مجلس رئيس او ټولو غړو د غور غږ سیمه اییزې راډیو دخبریال اومسئول بسم الله عادل ایماق په ګډون دخبریالانو او مدني ټولنې د فعالانو د وژنو زیاتوالې څخه اندېښنه وښوده او د نوموړي د شهادت په نسبت د ډاډګېرنې د څرګندولو ترڅنګ پرېکړه وکړه چې د خبریالانو او مدني ټولنې د فعالانو د ځنځیري اوهدفي وژنو زیاتوالي څخه د مخنیوي او د دوی د امنیت د ټینګښت اړوند دې د مجلس له آدرسه اعلامیه خپره شي.

14-Jadi99-JAL2.JPG

 غونډه کې سناتورانو وویل، ټاکل شوې نږدې راتلونکې کې د افغانستان اسلامي جمهوریت مذاکراتي ټیم د طالبانو استازو سره د سولې خبرو اترو د دویم پړاو د پرمخ وړلو په موخه دوحې ته روان شي او د افغانستان خلک هیله مند دي چې حکومت او طالبان په اوربند سلا شي.

غونډه کې یوشمېر سناتورانو وویل دې وروستیو کې د امریکا دمتحده ایالاتو دبهرنیو چارو وزیرمایک پمپیو په خوښۍ سره ویلي چې د تیر یوه کال په اوږدو کې افغانستان کې هیڅ امریکایي پوځي نه دی وژل شوی.

دا په داسې حال کې ده چې د افغان ولسونو پر وړاندې تاوتریخوالي زیات شوي او په دې موده کې د طالبانو له خوا د خبریالانو او مدني فعالانو په ګډون ګڼ شمېر ملکي او پوځي کسان افغانان په شهادت رسیدلي.

د جرګې ځینوغړو د عامې روغتیا وزیر ډاکټر احمدجواد عثماني عزل کول یو سلیقوي، سیاسي او غیر قانوني اقدام وباله او وویل یاده چاره به د عامې روغتیا وزارت کې کاري باور او ټیکاو زیانمن کړي او ترڅنګ به یې د ملت او دولت ترمنځ د باور فضا او د قانون نه منل زیات کړي او زیاته یې کړه، جرم یو شخصي عمل دی او نورو پورې تړاو نه لري.

د ویلو ده چې څو ورځې وړاندې د احمدجواد عثماني ورور او د عامې روغتیا درې نورکارکوونکي د بډو اخیستو په تور د څارنوالۍ له خوا د ملي امنیت ریاست په همغږۍ نیول شوي و او یادعمل سبب شو چې د عامې روغتیا وزیر د هېواد د جمهور رئيس له خوا عزل شي.

14-Jadi99-JAL4.JPG

د بحثونو جمع بندۍ کې د مشرانوجرګې رئيس د سولې بهیر ته په اشارې سره وویل چې نږدې راتلونکي کې به د دوحې مذاکرات پیل شي چې هیله مندیودې پړاو کې په اوربند سلا وشي او زیاته یې کړه، مشرانوجرګه د دولت لوري پلاوي سره اړیکه کې ده ترڅو د سناتورانو نظریې ورسره شریکې شي.

فضل هادي مسلم یار د امریکا د بهرنیو چارو وزیر د څرګندونو اړوند وویل چې یاد هېواد دخپلو موخو اوګټو سره سم عمل کوي دا چې افغانستان کې د یوه کال په اوږدو کې یو امریکایي هم د طالبانو له خوا نه دی وژل شوی برخلاف د خبریالانو او مدني فعالانو په ګډون سلګونه ملکیان او پوځیان په شهادت رسیدلي چې د طالبانو له پاره شرمناکه ده او هیله ده چې د یادې ډلې مشران هېواد ته په ګډه فکر وکړي او باعزته سولې ته غاړه کیږدي.