د افغانستان د اسلامي جمهوري دولت دملي شورا مشرانوجرګه د ژور مسوولیت، اسلامي او تاریخي رسالت د احساس په درلودلو سره چې د هیواد د ځوریدلو خلکو پر وړاندې یې لري، په کره ډول د افغانستان په جغرافیا کې د سولې، ټیکاو د ټینګښت، د جګړو او وینې توییدنې د مخنیوي د پروسې څرنګوالی څاري، په دې لاره کې د افغانستان اسلامي جمهوري دولت هلې ځلې چې په پای کې په دوحه کې د خبرو اترو پر میز د افغانستان د اسلامي جمهوري دولت او د طالبانو ډلې د مذاکره کوونکي پلاوي پر مخامخ ناستې تمامې شوې، بریالۍ بولي او د افغانستان اسلامي جمهوري دولت له طرحو سره سم چې د خلکو عامه افکار تمثیلوي، اعلانوي چې:

د دوحې ناسته او د بین الافغاني خبرو اترو پیل د جګړې د ښکیلو لورو او د افغانستان باغیرته خلکو له پاره یو طلایي چانس دی، نو د افغانستان مشرانو جرګه چې د خلکو د ارادې ممثله او د هیواد د ملي ګټو مدافع ده د افغانستان اسلامي جمهوري دولت او طالبانو څخه هیله کوي، چې په پوره صبر، حوصله او زغم سره د اسلامي ورورګلوۍ او یووالي او د یو بل د منلو په فضا کې جګړې، وینې توییدنې، ورور وژنې چې د افغانستان خلکو ته نور د زغم وړ نه دي، خبرې اترې پر مخ بوځي او داسې پایلو ته ورسیږي چې د افغانستان ټولو خلکو ته د منلو وړ وي.

د افغانستان مشرانو جرګه ټینګار کوي چې اوربند باید د خبرو اترو د اجنډا په سر کې ځای ولري، د اسلام د سپیڅلي دین اوامر، ارزښتونه او اصولو، او محمدي شریعت دې د خبرو اترو اساس وټاکل شي چې دا د افغانستان د خلکو ډیره پخوانۍ هیله او ارزو ده. تلپاتې سولې ته د رسیدو په موخه دې په دې خاوره کې د میشتو قومونو، ملیتونو او اقشارو انساني، اسلامي مدني حقوقو په ځانګړي ډول د ښځو حقونو او د دینی او مذهبی اقلیتونو په خوندي کولو سره عاقلانه پریکړه وکړي.

هوکړې باید د افغانستان اسلامي جمهوري دولت اساسي قانون ته د درناوي او په هیواد کې د اسلامي جمهوریت د ټولنیزو او سیاسي بنسټونو د پایښت ضمانت وکړي. جمهوري نظام د افغانستان د خلکو د قهرمانه مبارزو پایله ده او بل هیڅ بدیل نه لري.

د افغانستان مشرانو جرګه اعلان کوي هر هغه هوکړه چې په هغې کې ټول تاریخی ویاړونو او په ځانګړی ډول د افغانستان د خلکو ۱۹ کلنې دموکراتیکې لاسته راوړنې له پامه وغورځول شي، د اعتبار وړ نه ده.

د خبرو اترو له دواړو لورو په کلکه غوښتنه کیږي چې خبرې اترې باید یوازې بین الافغاني وي او هیڅ بهرنی لامل او انګیزه او د پردیو د ځان غوښتنې موخې باید د خبرو اترو اساس ونه ګرځول شي چې دا چاره په هیواد کې باعزتې سولې، د خلکو نیکمرغۍ او ارامۍ، خپلواکۍ او ازادۍ او د هیواد پرمختګ ته زیان اړوي.

د یادونې وړ ده چې د افغانستان مشرانو جرګه خوشبینه وه چې د قطر په پلازمېنه دوحه کې د امریکا او طالبانو ترمنځ د هوکړې په لاسلیک کیدو په ځانګړي ډول د بین الافغاني ناستې تر پیلیدو وروسته به په هیواد کې جګړه او تاوتریخوالی کموالی ومومي، څو خبرې اترې د ښه نیت په فضا کې یوداسې پایلې ته ورسیږي چې د افغانستان خلک یې هیله لري، خو بدبختانه طالبانو نه یوازې له جګړې او ترهګرۍ لاس وانخیست بلکه د قطر د هوکړو پرخلاف یې چاودنو او ځانمرګو بریدونو ته زور ورکړ، پر لویو ښارونو او د افغانستان پر ټولو ولایتونو یې ډله ییز بریدونه وکړل، لویې لارې یې وګواښلې، عامه بنسټونه او شتمنۍ یې له منځه یوړې او د خونړیو تراژیډیو د رامنځته کیدو لامل وګرځيدل او په دې بهیر کې سربیره پر دې چې د جګړې ښکیلو لورو ته درنه مرګ ژوبله اوښتې، په سلګونو ملکي وګړي شهیدان او ټپیان شوي دي او په زرګونو کورنۍ د خپلو کورونو پریښودو ته اړې او کورني اجباري مهاجرت ته اړایستل شوې. پر دې سربیره طالبانو د خبرو اترو پر میز د خپلو غیر عملي اصلي سرو لیکو په اړه هیڅ ډول نرمښت نه دی ښودلی، ان تر دې چې د دوی دې لجاجت بین الافغاني خبرې اترې له ځنډ سره مخ کړې چې د دوی دا غیر عاطفي، غیر مسولانه او امتیاز غوښتونکې کړنې د خلکو، د افغانستان مشرانو جرګې او ان د سیمه ییزو او نړیوالو ټولنو د ژورې اندیښنې وړ وګرځیدې.

د افغانستان مشرانو جرګه ددې اعلامیې له لارې طالبانو او د هغوی ملاتړو ته دا په ګوته کوي چې د جګړې، تاوتریخوالي، ترهګرۍ، چاودنې او ځانمرګو بریدونو دوام د افغانستان د کشالې حل لاره نه ده او دوی باید پر دې پوه شي چې نور نه دوی او نه هم کومه بله ډله د تیري، د ټوپک په زور، تاوتریخوالي او ویرې اچونې له لارې د افغانستان پر خلکو خپله واکمني ټینګه کړي، له دې امله له طالبانو یو ځل بیا غوښتنه کیږي چې د قطر ژمنو، په هیواد کې سولې او ټیکاو رامنځته کیدو د افغانستان د خلکو اړتیاوو ته په پاملرنې سره دې په بین الافغاني خبرو اترو کې نرمښت وښيي، څو د افغانستان خلک چې له کلونو راهیسې د تحمیلي او نیابتي جګړې د سونګ توکي دي، د یوې تلپاتې او باعزته سولې خاوندان شي. که چیرې طالبان تاوتریخوالي او جګړې ته پای ورنه کړي او د افغانستان د سولې اړوندو مسایلو پر وړاندې له ځانه نرمښت ونه ښيي، نو د راتلونکو خطرناکو عواقبو او کړکیچ ته د هیواد د ورټیل وهلو مسوولیت به د دوی پر غاړه وي.

د افغانستان مشرانو جرګه د هیواد پر دفاعي او امنیتي ځواکونو ویاړي، هغوی د افغانستان په جغرافیا کې د نړۍ د خلکو په نیابت په پوره میړانه، شجاعت او قربانۍ د نړیوالې ترهګرۍ پر وړاندې په جګړه بوخت دي، ټینګار کیږي چې د افغانستان اسلامي جمهوري دولت دې په پوره درایت او ځیرکۍ سره د هیواد د وسله وال پوځ د جګړیزو وړتیاوو په لوړوالی کې هلې ځلې وکړي، څو هغوی د خدای، وطن او خلکو پر وړاندې خپلې سپیڅلې دندې په لوړ جګړیز مورال سرته ورسوي.

په پای کې د افغانستان مشرانو جرګه هغو ناوړه حالاتو ته چې د هیواد مظلوم ولس ورسره مخ دی، په پاملرنې له ټولو مشرانو، سیاسي ګوندونو، علمای کرامو، پوهانو، مدني ټولنې، ځوانانو، ښځو او په افغانستان کې د میشتو وروڼو قومونو څخه غواړي چې د یووالي، پیوستون، اتحاد او اتفاق، همپالنې او د یو بل منلو د ټینګښت او رامنځته کیدو له لارې دې په یوه لیکه ودریږي او له ډله ییزو، قومي، ګوندي او سلیقوي ګټو دې تیر او د هیواد او د خلکو ملي ګټې دې په پام کې ونیسي، د لوی خدای تعالی په نوم او د هیواد د خلکو د نیکمرغۍ او ارامۍ او پر ستونزو د بري په نوم دې خپلې مبارزې ته دوام ورکړي، بری مو په یووالي کې دی.

و من الله توفیق