د ملي شورا مشرانو جرګه د جمهوري ریاست د لومړي مرستیال امرالله صالح په موټریز کاران سهارنې ترهګریز برید چې د نوموړي د لږ ټپ، د سړک د دواړو خواو د هټۍ والو او اوسېدونکو په ګډون د ملکي خلکو او د نوموړي د ساتونکو د شهادت او ټپی کېدو او همدا راز د کابل ښار د تایمنی سړک کې د مالي پراخو زیانونو او د اور سوځېدنې لامل شو، په کلکو ټکو غندي.

یاده تروریستی خاینانه چاودنه په دې معنی ده چې د افغانستان پټ او ښکاره دښمنان غواړي د افغانستان د سولې خبرې اترې زیانمنې کړي ترڅو هېواد د داسی یو تاریخي فرصت څخه بی برخې شي او افغانستان کې د جګړې او وراني په دوام سره وکولای شي خپلو شومو موخو ته ورسیږي.

مشرانو جرګه د یادې زړه بوږنوونکې پېښې د شهیدانو روح ته د دعا او ټپیانو د سملاسی روغتیا ترڅنګ د یادې قضیې د جدي رسیدګۍ او د افغانستان د سولې او امنیت د دښمنانو د جدي ټکولو غوښتونکې دي.

له شک پرته چې يادې قضیه کې د پردیو استخباراتو ناپاکه لاسونه ښکېل دي، افغان حکومت باید یادې برخه کې د نه منکریدونکو اسنادو په ترلاسه کولو سره د ملګرو ملتونو سازمان د امنیت شورا ته شکایت وکړي او افغانان باید د هېواد د تور زړونو دښمنانو د استخباراتي توطیو د ناکامولو په موخه د بشپړې هوښیارۍ او ویښتیا سره د افغانستان اسلامي جمهوری نظام او دولت سره له مخکې زیات همغږي شي.

د ملي شورا مشرانو جرګې رئيس

فضل هادي مسلم یار