د ملې شورا مشرانو جرګې خبر تر لاسه کړی، د امریکا دمتحده ایلاتو ځینو غړو سپنې ماڼۍ ته وړاندیز کړی چې د ډیورند کرښي تررسمیت پیژندلو پوري دي، له افغانستان سره مرستې مشروطي شي.

د ملې شورا مشرانوجرګه دا ډول نفاق او تفرقه اچونکي وړاندیزونه په کلکه غندي او څرګندوي چې افغانستان یو آزاد او خپلواک هیواد دی او دسیمي او نړي د ټولو قضایاو او مسایلو کي په وړاندي به د هیواد د لوړو ملي ګټو په پام کي نیولو سره تصمیم نیسي.

د ملې شورا مشرانوجرګه څرګنده وي، چې د ډیورند کرغیړنه کرښه د انګریزي استعمار په مهال زموږ په ولسونو تپل شوي او افغان ولس يي په دوو ټوټو ویشلی، خو د هیواد اتل او زړور ملت د ددي منحوسي کرښې د غزولو له نیټې راهیسي تر ننه د استعمار په وړاندي تل پاتي سر ښندني کړي دي.

د ملې شورا مشرانوجرګه اعلاموي چې ددي تپل شوي کرښي د رسمیت پیژندلو په اړه د امریکا او ځینو دښمنو هیوادونو او کړیو سپارښتني د افغان ملت لپاره د منلو وړ نه دي او په دی هکله به یوازي او یوازي د کرښي د دواړو خواو ولسونه پریکړه کوي.

د ملې شورا مشرانوجرګه په داسی حال کي چي دا ډول پیشنهادونه د افغانستان په کورنیو چارو کي بر بنډه لاسوهنه ګڼي؛ ټینګار کوي چي د ملي وحدت حکومت دي، د هیواد د باتور او مسلمان ملت د لوړو ګټو خلاف وړاندیزونو او دي ته ورته هڅو په وړاندي باید خپل جدي غبر ګون ښکاره کړي .ومن الله توفیق

د مشرانوجرګې رییس

فضل هادي مسلم یار