د ملي شورا مشرانو جرګې په ژورې خواشينې او خفګان سره خبر ترلاسه کړ چې د دين او انسانيت دښمنانو تېره ورځ د ټولو اسلامي او انساني موازينو خلاف د خيرخانې د قلعه نجارا سيمه کې ميشت د امام زمان په جامع جومات چې د نارينه او ښځينه وو په ګډون سلګونه تنه مسلمانان د جمعې د لمانځه په ادا کولو بوخت وو، ترهګريز او وحشيانه بريدونه ترسره کړل چې د دغه وحشت او دهشت په پايله کې د ښځو او ماشومانو په ګډون لسګونه تنه لمونځ کوونکې په بي رحمۍ سره شهيدان او ټپيان شول.

د ملي شورا مشرانو جرګه د دغه زړه بوږنوونکې پېښې د غندلو تر څنګ، د لايزال رب له دربار څخه شهيدانو ته د فردوس جنت، ټپيانو ته د سملاسي روغتيا او پاتې کسانو ته يې د جميل صبر دعاګاني کوي او څرګندوي چې د افغانستان عالمان، د نړۍ د هېوادونو مشران، د ملګرو ملتونو سازمان او د اسلامي او بشري ټولنو بنسټونه د دغه ډول جنايتونو او بشري ضد اعمالو پر وړاندې چپه خوله پاتې نه شي او زموږ د کړيدلي ولس په ژغورنه کې ګډ اقدامات وکړي او هم مسئول ارګانونه مکلف دي چې د تروريستي بريد د طراحانو د نيولو او مجازاتو سربېره، د هېوادوالو د امنيت په ټينګښت او په ځانګړې توګه د تکيه خانو او پاکو ځايونو د امنيت په برخه کې خپلې هڅې ګړندۍ کړي تر څو هېوادوال له وېرې پرته خپل ديني فرايض ترسره کړي.

زموږ د خاورې دښمنان بايد پوه شي چې په افغانستان کې د شيعه او سني افتراق ځاي نه لري، بلکې د تېرو کلونو په ترڅ کې دغې ننګينې او اسلام ستيزانه پديدې د سيمې د وېره اچوونکو ډلو تر منځ لکه د لشکر طيبې او د دي په شان د نورو ډلو تر منځ د استخباراتي معلوم الحال کړيو مشرۍ لاندي او د اسلام د مبين دين دښمنان د مسلمان امت د جدايۍ او فتنې پارولو په موخه فعاليت درلود چې دم ګړۍ د داعش تر نامه لاندي بشري ضد جنايتونه ترسره کوي خو د افغانسان مسلمان او يو بل سره ورونه قومونه به د دغه حيوان صفته جنايت کارانو پر وړاندې د اسلامي او ملي يووالي لوحې لاندي ودريږي او خپله مبارزه به پرمخ يوسي. و من الله توفيق.

د ملي شورا د مشرانو جرګې رئيس

فضل هادي مسلميار