په دي کتنه کې چې د کورني امنيت او دفاعي چارو، نړيوالو چارو د کمېسيونونو غړو، يو شمېر نوروسناتورانو او د دارالانشا لوي رئيس هم ګډون درلود، د فدراتيفې روسيې سفير د خپل متبوع هېواد د مرستو د وړاندي کولو منجمله د لس زره ميله کلاشينکوفونو او افغانستان ته په ملکي او پوځي برخو کې د سلګونو تحصيلي بورسونو د ورکړې څخه يادونه وکړه، ويې ويل چې ټاکل شوې د يو سلو اتيا زياتې نورې پوځي بورسيې هم د افغانستان په واک کې ورکړل شي، ښاغلي مانتيتسکي د افغانستان طالبانو سره د روسيې د اړيکو په اړه د افغانستان او پاکستان له پاره د روسيې د ځانګړي استازي ضمير کابلوف د وروستيو څرګندونو په اړه وويل چې د نوموړي له خبرو څخه بل ډول برداشت اخيستل شوې چې ګواګې روسيه د طالبانو سره همکاري کوي چې دا ډول نه بلکې ځينې روسي مسئولين د دي هېواد د يو پيلوټ د خوشې کېدو له پاره چې د طالبانو ډلې له خوا اسير شوي وو د ٢٠١٤ کال څخه مخکې له دوي سره اړيکه درلوده او نوموړې يې د طالبانو له حبس څخه خوشي کړ.

همدا راز نوموړي د دي کتنې په جريان کې د مشرانو جرګې دفاعي چارو او نړيوالو چارو کمېسيونونو سره په ناسته کې د لا زياتو څرګندونو غوښتونکې شو.

ورپسې فضل هادي مسلم يار په خپلو خبرو کې د ياد هېواد له مرستو خخه مننه وکړه او ويې ويل، افغانستان د يو خپلواک او آزاد هېواد په توګه او د ملي ګټو او متقابل احترام په پام کې نيولو سره د سيمې او نړۍ هېوادونو او په ځانګړې توګه فدراتيفې روسيې سره د همکارۍ او اړيکو د پراخوالي غوښتونکې دي او په خواشينۍ سره د طالبانو د ترهرګرې ډلې په اړه د روسيې حکومت د استازي وروستيو خبرو او د افغانستان د وضعيت څېړنې په اړه د ځينو هېوادونو په ګډون په مسکو کې د کنفرانس جوړېدل چې د افغانستان حکومت په جريان کې قرار نه لري، زموږ او زموږ د هېوادوالو د اندېښنو سببب شوي دي.

فضل هادي مسلميار ټينګار وکړ، که چېرې د روسيې حکومت وغواړي تر څو د شته اندېښنو د حل له پاره کار وکړي، اړتيا شته چې مسئول چارواکي د طالبانو سره د همکارۍ په برخه کې د ياد هېواد د ځانګړي استازي څرګندونې د مطبوعاتو له لارې رد او د افغانستان حکومت ته ډاډ ورکړي چې داسي کوم څه نه شته، د مشرانو جرګې رئيس همدا راز تياري وښود چې په نږدي ورځو کې به د مشرانو جرګې د کورني امنيت، دفاعي چارو او نړيوالو چارو کمېسيونونوسره به د نوموړي د ناستې زمينه مساعده کړي.