د مشرانو جرګې د دويم نايب حاجي رفيع الله ګل افغان په مشرۍ د ريسانو د کمېټې په غونډه کې د عمومي غونډو د اجندا ټاکلو او د کمېسيونونو د کاري چارو د تنظيم په اړه د بحث سربېره، څرګنده شوه :

چې د هېواد عمومي وضعيت، په وزارت خانو او ولايتونو کې د سرپرستۍ د څرنګوالي د راروان ژمي له پاره د بيړنو حالاتو د کمېټې د تياري په اړه بحث وشي. او د جدي په دويمه د سېشنبې ورځې په عمومي غوڼډه کې د هېواد د امنيتي وضعيت په اړه د معلوماتو د وړاندي کولو په موخه دي د افغانستان د ملي امنيت مشاور محمد حنيف اتمر اشتراک وکړي او د سناتورانو پوښتنو ته دي ځوابونه وړاندي کړي، او هم د احصائيې په قانونکې د تعديل طرحه دي عمومي غونډې ته وړاندي شي.

همدا راز په غونډه کې د پاکستان د پيښور په ښار کې پر يو پوځي ښوونځي پروني تروريستي بريد چې له امله يې شاوخوا ١٤٠ تنه ووژل شول او د دوو سوو زيات ټپيان شول په کلکه غندي او هيله څرګنده شوه چې د پاکستان حکومت دي د افغانستان په همکارۍ د تروريزم پر وړاندې د مبارزې په برخه کې چې د اسلامي او انساني ټولو موازينو خلاف دي، عملي اقدامات وکړي.

د غونډې په پاي کې د دفاعي چارو او کورني امنيت کمېسيون ته دنده وسپارل شوه تر څو د ياد کمېسيون په يوې غونډه کې د امنيتي ارګانونو لوي چارواکي دعوت او د دي ارګانونو د تدابيرو په اړه رپوټ عمومي غونډې ته وړاندي کړي.